|
Stórsýningin
Verk og vit 2006 opnuð í Laugardalshöll
Reykjavík, 16.
mars 2006
Stórsýningin Verk og vit 2006 var opnuð af
Valgerði Sverrisdóttur, iðnaðar- og viðskiptaráðherra, við hátíðlega athöfn í
nýju íþrótta- og sýningahöllinni í Laugardal í dag. Ráðherra sagði að við
lifðum á mesta framfaraskeiði í sögu þjóðarinnar þar sem
gríðarlegar fjárfestingar ættu sér stað við uppbyggingu á öllum sviðum.
Fjármunamyndun í byggingum og mannvirkjagerð á síðasta ári hafi
verið um 180 milljarðar króna sem er ríflega 17% aukning frá árinu áður. „Íslenskt hugvit og
handverk ráða við að byggja flest þau mannvirki sem hér þarf að reisa. Samtímis hafa fagmennska og þekking
aukist á öllum sviðum svo sem í byggingarrannsóknum, hönnun, framkvæmdum og
fjármálaþjónustu. Sýningin hér í Laugardal sýnir það betur en nokkur orð fá
lýst hve nauðsynlegt það er að verk og vit haldist í hendur.“
Steinunn Valdís Óskarsdóttir borgarstjóri
sagði að það væri augljóst af
metnaðarfullri uppbyggingu í Reykjavík, ekki síst í miðborginni, að borgin
hefði notið vaxandi fagmennsku sem einkenndi byggingar- og skipulagsmál á
Íslandi.
Sveinn Hannesson, framkvæmdastjóri Samtaka iðnaðarins, sagði að undanfarin
ár hefðu verið eitt mesta framkvæmdaskeið í sögu þjóðarinnar. Mikil fjölgun
ársverka og veltuaukning í byggingariðnaði og mannvirkjagerð væri til vitnis um
þennan vöxt. Fara þyrfti þrjátíu ár
aftur í tímann, til áranna eftir Vestmannaeyjagosið, til að finna sambærilegar
tölur um fjölda íbúða sem lokið væri við. Í fyrra hafi verið byrjað á nálega 3.000
íbúðum á landinu, sem er Íslandsmet. „Tilgangurinn með sýningunni er að sýna
það nýjasta á sviði byggingariðnaðar og mannvirkjagerðar og um leið að sækja
fróðleik og skemmtun. Hér hefur tekist
vel til.“
Verk og vit 2006 stendur yfir dagana 16. til 19.
mars en þar kynna starfsemi sína yfir 120fyrirtæki í byggingariðnaði og mannvirkjagerð, sveitarfélög, hönnuðir og
ráðgjafar. Sýningin, sem er bæði fyrir fagaðila og almenning, er opin
almenningi laugardaginn 18. og sunnudaginn 19. mars en fagaðilum fimmtudag og föstudag.
Í
tengslum við sýninguna verða haldnar ráðstefnur og kynningarfundir, m.a. um nýja
tónlistar- og ráðstefnumiðstöð við Austurhöfn og nýjan Landspítala. Ennfremur
mun Reykjavíkurborg kynna hvað efst er á baugi í skipulagsmálum.
AP sýningar, sem er í eigu AP
almannatengsla ehf., sér um framkvæmd sýningarinnar í samvinnu við iðnaðar- og
viðskiptaráðuneytið, Reykjavíkurborg, Samtök iðnaðarins, Landsbanka Íslands og
Ístak.
Nánari upplýsingar um Verk og vit 2006: verkogvit.is
Nánari upplýsingar um AP almannatengsl: www.appr.is
|
Á sýningunni kynntum við í fyrsta sinn nýtt
hirslukerfi sem heitir ORSY BULL og er það mjög meðfærilegt og auðvelt
að stafla saman einingum og tengja borð við - Mjög stabíl og
auðfæranleg vinnuaðstaða og einingarnar henta mjög vel til flutninga á
verkfærum og öðrum aðföngum ásamt því að vera góðar hirslur í bíla. Kynnum þetta ásamt fleirri nýjungum hér nánar síðar. 
